‘n Week van lekker werk

Ondanks wat die grootste gros mense dink, het onderwysers het baie min tyd vir hulle self. Van die begin van hierdie jaar af moet alle punte voor die aanvang van ‘n skoolvakansie by die departement ingehandig word. Dit plaas ons vir ‘n paar weke onder baie groot druk, MAAR… dit gee ons dan ‘n welverdiende vakansie sonder merkwerk. Voorbereiding vir die nuwe termyn moet egter nog gedoen word, so ons kom nie skotvry af nie.

Dis lekker om te sê dat ek al my handwerk doelwitte hierdie week bereik het. Ek het verder met my glas ge-eksperimenteer…

 

As ek net beheer gehad het oor die lugborreltjies, dan sou ek baie gelukkiger gewees het. Maar nou ja, handgemaakte goed is altyd uniek

Komkommerkoel

‘n Vroulike toevoeging tot my juweelkissie

Natuurlik moet ek altyd ook ‘n armband maak om te pas by iets wat nog nie ‘n maatjie het nie

Die agtergrond glas is nie swart nie, maar ‘teal’

Bling! Vreeslike vrolike hangertjie

Ek het pewter geskenke gemaak en mosaïek ingesluit in ‘n multimedia servethouer.

Mosaiek bo-kant van ‘n servethouer

Die kant van die houer is gepewter

Servethouer volledig in pewter

Die glasklippies gee net ‘n finale afronding met kleur van die ontvanger se keuse

Kremetart op canvas

Twee ander doelwitte was om te lees, iets waarvoor ek bitter min tyd het, en om vir ‘n slag iets vir een van my ander blogs te skryf. Beide is gedoen… Dan het ek tussen deur ook tyd spandeer aan my twee kleinkinders, inteendeel, ek het hulle vir vier dae opgepas terwyl hulle mamma en pappa ‘n blaaskansie gevat het.

Zelmarie en Roelof, my dierbare kleinkinders wat ek so bevoorreg is om elke dag te sien

Die uiltjie is nie handwerk nie, dit was sommer bietjie hartswerk. Ons het hom in die garage gekry en was bang die honde gaan hom verinneweer. Toe maak ek hom in my man se werkskamer toe tot die aand. Alhoewel hy vir my geblaas en sy snawel geklap het, het hy  my toegelaat om hom te hanteer. Wat ‘n voorreg om in daardie deurdringende kykers te kyk, geen foto laat reg geskied aan daardie goudgeel blink kykers nie. Sy vlerke is al mooi sterk en sy ma het hom kom haal die aand. Net na skemer het hy begin kras en die volgende oggend was hy weg.

Gevlekte ooruiltjie